ذكريات...الثلاثاء ١٨ يناير ٢٠١١
ذهبت الى مبنى ماسبيرو كان فيه احساس غريب جدا حاسس بجو حار خانق جدا داخل اروقة المبنى حتى الناس كان احساسهم مختلف قابلت زميلين من القناة الثالثة من أبناء "الحزب الوطني" وكانوا طامعين ان قربهم من الحزب والسلطة ممكن يخليهم أقرب للمناصب ويترقوا بسرعة. حاولوا يوصلوا بتقديم كافة التنازلات ولكن لم يحصلوا على اي مناصب.. اشتكوا جدا من القيادات.. طبعا ده لاني زي ما قلت قبل كده كنت صديق لانس الفقي وزير الإعلام في هذا الوقت .
صديق الوزير !!
كان هناك اعتقاد سائد اني من الممكن أن اكون واسطة لانس.. ( لازلت احتفظ لانس الفقي رغم كل شئ بمكانة في قلبي) المهم أنى احسست بخنقة في ماسبيرو كمان شعرت ان معظم الناس حتى العادية مخنوقة.. الغريب بقى وانا ذاهب الى ماسبيرو كان لون كل الوجوه كئيب ! الناس في ميدان عبدالمنعم رياض كانت غريبه شعرت أن كل الألوان رمادي حتى الألوان الزاهية كانت رمادية.. الناس تايهة في عبدالمنعم رياض.. بعد ما خرجت من المبنى رجعت تاني أنظر في وشوش الناس لقيتها زي ماهي مكتومة و سودة وكانها لون الرصيف !! الساعة كانت حوالي ٥ عصرا.. في يناير الجو كان حار وخانق ازاي ! لا أعلم .. فجأة وانا في عبدالمنعم رياض لقيت تليفون من انس الفقي لا أعلم لماذا ؟ ودار بينا هذا الحوار .
انت فين ؟
*أنا في عبدالمنعم رياض يا فندم حضرتك فين ؟ ** أنا في لندن بس راجع على شرم الشيخ عشان المؤتمر الاقتصادي انت بتعمل ايه في عبدالمنعم رياض * هههههههه.. مستني الميكروباص عادي يعني .. ** ايه الاخبار عندك عامل ايه .. * مش عارف بس الجو حر والناس مكتومة و الدنيا كلها الوان رمادية.. الناس زهقانة حتى اللي منكم والقريبين منكم زهقنين منكم.. الناس وصلت لاخرها حتى ماسبيرو الناس وصلت لاخرها.. **انت بتقول ايه ! مالها الناس أنا في لندن رايح شرم ويوم السبت تجيني انت وعصام سعيد بس انت شايف ايه .. *أنا شايف انه خلاص الناس في كل مكان مابقتش مستحملة حتى رجالتكم اما ماسبيرو فبقي خرابه بقى ( ماسبيرو دلوقتي بقي بقايا الخرابة دي.. دمروا الخرابة) **انا منتظركم يوم السبت وتجيب معاك اي اقتراحات ليك بخصوص ماسبيرو.. الساعة ١٢ ها انتظركم.. سلام * مع السلامة يا افندم..
السبت ٢٢ يناير.. ١٢ ظهرا.. مكتب وزير الإعلام
دخلت المكتب بعد سهرة طويلة حاولت فيها ان اكتب روشتة شامله لكل حاجة في المبنى العتيق ورغم الدعوة ل٢٥ يناير كنت متخيل ان ممكن تغيير شامل يحصل يغير المعادلة.. كتبت كل اللي ممكن يتعمل.. دخلنا المكتب كان منتظرنا انا وعصام.. طلبنا قهوة ساده.. وبعد السلام وحمدالله على السلامة.. قال لنا في ايه بقى..عصام لانه اكثر خبرة وسياسي اكتر مني حاول يوصل كلام بلغة السياسيين أصحاب الخبرة.. اما انا قدمت له كل اللي كتبته على الاقل بخصوص ماسبيرو وكان اول بند تطهير ماسبيرو من كل قياداته بما فيها مكتب انس نفسه.. وبعدين خطة بقى لكل حاجة..
الصدمه !!
الوزير بص في الورق كان أول بند صدمة بالنسبة له.. تغيير كل قيادات ماسبيرو وبدأ يستفسر وانا ارد.. عصام ساكت بيراقب الموقف حاسس اني بطلب المستحيل.. وكان عنده حق ودي ميزة السياسي عن المجانين اللي زيي. المهم.. قلت له حضرتك ايه رايك.. سيادتك موافق على اللي مكتوب والا رايك ايه.. فقال انا مش مختلف معاك بس اصل الموضوع مش كده ده محتاج وقت وترتيب وتجهيزات فقلت له حضرتك معاك قلم.. امضي على إقالة كل الناس دي ونشوف ممكن ايه يتعمل. ( عصام سعيد كان قرر ياخدني على مستشفي المجانين) فقال الوزير اصل المسألة محتاجة شوية وقت.. فقلت له يعني حضرتك مش موافق.. تمام.. ممكن الورق بعد اذنك. فرد سيب الورق خليني ابص عليه في شوية وقت!! فقلت له حضرتك معدش فيه وقت.. ممكن الورقة اخدت الورق وقمت من على الكرسي.. : حضرتك للموضوع مش ها يتغير غير بثَورة !! اخذت الورق وخرجت من المكتب ولم استأذن. كانت صدمة كبيرة للوزير وعصام سعيد اللي حاول يهديني بس انا كنت خلاص.. زي الناس زهقت ونزلت القناة التالثة و انا في منتهى العصبيه وأستمرت هذه الحاله وقت ليس بقليل .
نفس اليوم ٥ مساءا.. النادي الأهلي
تليفون تاني من الوزير انس الفقي * انت فين ؟؟ ** أنا في النادي الأهلي حضرتك.. مع أبنى فى تدريب السباحة .* فقال أايه موضوع يوم الثلاثاء اللي بتدعي ليه ؟؟ فقلت له يوم الثلاثاء مظاهرات بس انا مش داعي رئيسي. انا بشير الدعوة بس.. ** فرد قائلا انا جاني تقرير دلوقتي من الأمن ومن الأجهزة بتقول انك بتدعي للمظاهرات وفي ناس كلموني !! فقلت له مين كلم حضرتك غير الأجهزة.. حد من القناة السادسة مثلا.. رئيسها مثلا اللي انا رشحته لحضرتك والا حد تاني طمعان في الكرسي بتاعه.. عموما انا متعود كل ما ابقى مع حضرتك على تليفونك.. و حضرتك متعود على كلامهم عني بس انا فعلا نازل يوم الثلاثاء ٢٥ المظاهرات بس انا مش داعي ليها لكن اي مظاهرات هتحصل انا موجود فيها . فرد انت دايما بتحرجني قدام الناس والاجهزة.. ممكن ما تنزلش .. فرديت عليه رد قاطع اسف يا افندم. ممكن حضرتك تقولهم ده واحد مجنون .. واشكر لي كل المخبرين اللي بيبلغوا حضرتك
الثلاثاء ٢٥ يناير. الثانية ظهرا
نزلت من الميكروباص عند إشارة الأوبرا.. السواقين كانوا بيرجعوا من عند الأوبرا.. مشيت على كوبري قصر النيل عديت الكوبري وكان عدد اللي ماشين على الكوبري قليل جدا ومع تقاطع الكوبري مع شار ع الكورنيش كانت أول البشاير مظاهرة شباب في مقتبل العشرينات.. التقيت يهم وقفت ابص عليهم في انتظار الالتحاق يهم.. اقترب مني شاب ١٧ سنة حضرتك مصرى ؟؟ ابتسمت وقلت له ايوه مصرى ياحبيبي قالي : طيب ياللا معانا : ما انا معاكم يا حبيبي.. ودخلت الميدان الساعة ٢.٣٠ ظهرا. حتى الساعة الخامسة.. كان لازم اروح ماسبيرو اشوف الاخبار ايه في ماسبيرو.. دخلت ماسبيرو وعندما دخلت قدمي القناة الثالثة.. كان أحد المخبرين يقف بجوار حجرة المدير العام... صاح من على بعد : على ابو هميلة مندوبنا في ميدان التحرير وصل يا جماعة.. قلت له طيب ما تزعق شوية اكتر على صوتك اكتر.. وابتسمت.. دخلت علي عصام الأمير اسأل أن كان في حد صور اللي بيحصل والا لا..
أخبرني انه في تصوير حصل الصبح :
والوزير بعت خد التصوير.. قلت له طيب نزل كاميرات تصور حتى لو مش ها تذيع دلوقتي.. قال لي منتظر تعليمات الوزير.... عدت مره آخري الي الميدان ومعي عصام سعيد وكان عنده إذاعة برنامجه الساعة ١١ بالليل. وفضلت انا وعصام لحد معاد برنامجه.. وراح هو التليفزيون وقعدت انا شوية وبعد كده روحت حوالي الساعة ١١.٣٠.. قبل معمعة اخر اليوم.. روحت على أمل العوده تاني يوم الاربعاء ٢٦ يناير.. فقد كانت هناك نيه على الاعتصام والاستمرار.. كان يوم طويل جدا ومرهق.. لكنه كان البداية لاجمل ايام الوطن عبر تاريخ طويل..