من يدير المحل !!
جماعة بلدياتنا طيبين قعدوا مع بعض و اتفقو يفتحو محل كبير يخدم أهل الناحية و يكسبو من وراه قرشين و قالوا نشغله على احدث نظام و عشان همه مش بتوع دكاكين و ميعرفوش في التجارة و مش متعودين عليها و يخافو منها و من مغامراتها و الاعيبها قالو احسن حاجة نجيب واحد يمسك المحل و يخليه حاجة كبيرة و حديثة و هنا ظهرت المشكلة نجيب مين يتولى المحل و يكون مسؤول عنه و بدأ التفكير و النقاش والحوار و الجدل .
نجيب مين ؟
- نجيب واحد ابن ناس من أسرة عريقة بيكون شبعان و متربي على الأصول و ميخونش و لا يسرق و يبقى واجهة كويسة و بريستيج يجذب الزبون.. لكن اللي زي ده ممكن يكون خامل و ضعيف الهمة لانه منعم و غالباً يكون عنده بذخ و حب الشهوات و خصوصا المسكرات و الستات و الاهم لو حتى سلم من العيوب دي فهو نظرته لكم أنه احسن منكم و أرقى و انقى سلالة و يبقى كده سلمتم إدارة المحل لأسرة واحدة للأبد و ممنوع حد منكم و من أولادكم يفكر يوم في إدارة المحل .
نفكر فى حد تانى !!!
خلاص نجيب واحد متدين و ابن حلال و بتاع ربنا و ده عمره ما يسرق أو يخون و كمان حيعمل سمعة طيبة للمحل و ثقة و يجذب ناس كتير.. اولا يا اسيادنا كلنا بتوع ربنا يعني هو بتاع ربنا و احنا بتوع الشيطان ؟! و هو كشخص و على الجانب الإنساني ممكن يكون طيب جدا و نقي جدا و أهدافه نبيلة لكن ليس هكذا تسير الأمور و حيقابله اشكاليات كتيرة تتعارض مع مبادئه مثلاً ازاي حيتعامل مع البنوك و السجائر و البيرة و بضائع كتير فيها شبهات أو تحريم و ازاي حيتعامل مع زباين المحل من الستات حينظر لها على أنها مجرد زبونة زي اي زبون راجل و لا على أنها إمرأة و اذا اختلفنا معاه يبقى اختلفنا مع شرع الله و ممكن يكون عنده برضو أن هو احسن مننا عشان هو متدين و بتاع ربنا و احنا بتوع العفاريت
ولا ده كمان نافع ! ايه الحل ؟
- خلاص احسن حل لظروفنا دي و التحديات اللي بنواجهها نجيب رجل قوي يحمي المحل و يحمينا من الاشرار من أهل البلد و المنافسين من البلاد التانية الكبيرة .. اهو كده جبتم الغم لنفسكم بايدكم و لفيتم الحبل على رقبتكم ، اولا الادارة و التجارة مش بالعافية دي فن ودراسة و ده رجل قوي و حيجيب اخواته و قرايبه يشغلهم في المحل بحجة أنه بيحمي المحل و حياخدو اللي عاوزينه و طبعا محدش فيكم حيقدر يفتح بقه و بعد فترة تلاقو المحل مديون و انتم بتشحتو و برضو هو عامل نفسه احسن منكم و مين اللي قال إن أهل البلد أعداء و عاوزين يخربو المحل ، المحل لو قدم خدمة كويسة باحترام و الناس حست أنه بيفيدها ساعتها همه اللي حيدافعو عنه و يدعموه و يكبر و يحمي نفسه و يحمينا كمان ؟
كل خيارتكم عفا عليها الزمن !
كل ده و فيه ابن واحد منهم قاعد شاب صغير من بتوع النت و وسائل التواصل و رغم لبسه البسيط الكاجوال و شعره الطويل و انعزاله اغلب الاحيان و نظرتهم له على أنه عيل طري و خرع إلا أنه رؤيته للأمور واضحة و من زوايا مختلفة بحكم الواقع الماثل أمامه و بحكم ثورة الاتصالات و بكل ادب استأذن الشاب في الحديث و قال .. أنا ابنكم الصغير و انتم كلكم زي ابويا بس معلش التفكير بتاعكم ده عفا عليه الزمن !
من الذى يجب ان يدير المحل ؟
السؤال المفروض يكون إزاي ندير المحل مش مين اللي يدير المحل الدنيا تطورت و سبل الإدارة الحديثة معروفة و مجربة و حققت نتائج على أرض الواقع الاول خالص حضراتكم تحددو نشاط المحل و نظامه و تعملو عقد بينكم يحفظ حق كل واحد فيكم و بعدين تعملو اعلان و الناس تتقدم و انتم تختارو من بينهم الشخص المناسب و لمدة معينة و صلاحيات و مسؤوليات محددة طبعا لازم تتبعو الأساليب الحديثة في المراقبة و الحساب مفيش حاجه اسمها المحل اهو اعتبره بتاعك و اعمل اللي انت عاوزه المال السايب يعلم السرقة لو طلع كويس يكمل طالما بيطور و شغال لو طلع منحرف و فاشل يتغير في اقرب فرصة و بأقل خسائر ممكنة كل المحلات الناجحة كده يا أبا الحاج انت و هو !!
المفاجأه !
وعي الشاب كان مفاجأة لهم و قالوا كلامك مظبوط يا ابني و انتم مظلومين و مطحونين بين العالم الافتراضي و خياله و بين الواقع المحبط و تحدياته و يجب عليكم النزول لأرض الواقع و نستعين بوعيكم و طاقتكم و تستعينو انتم بخبراتنا و نضجنا و ننظم نفسنا ساعتها نعمل اكبر محل في المنطقة و تديروه باحدث النظم و الأساليب.